Երբ մարդկությունը հորինում էր ինտերնետը, չգիտեր, որ օրերից մի օր գլոբալ մասշտաբով բիզնեսը կախում է ունենալու նրանից… Այսօր, երբ առանց ինտերնետի մեկ ժամ նույնիսկ չեն կարող դիմանալ միլիոնավոր մեծ ու փոքր կազմակերպություններ, ոմանք կարող են տարակուսանքով կողքից նայել իրենց և հասկանալ, որ նրանք ոչ միայն կախված են ինտերնետի լինել չլինելուց, այլ այսօրվա ինտերնետը «տնօրինող» Google-ից: Գուցե հարցնեք` իսկ ինչու` տնօրինող… այդպես, քանի որ մեր ժամանակներում ինտերնետային այդ գիգանտի շատ ծառայություններից և գործողություններից են կախված ինտերնետի հետ գոնե մի փոքր կապ ունեցող մարդկանց և կազմակերպությունների գործունեությունը և նույնիսկ կյանքը…

Այո, այսօր Գուգլից է կախված համարյա թե ողջ ինտերնետը, հայերեն ասած` համացանցը… Երկու ամիս է, ինչ սպասում եմ Գուգլի հերթական PR թարմացմանը: Նախորդ 2 անգամ Գուգլի PageRank update-ները տեղի ունեցան ժամանակային առումով մեկմեկու մոտ, և նույնիսկ անսպասելի, քանի որ Գուգլի մոտ չգրված օրենք է համարվել երկարաժամկետ ընդմիջումը, որն իր հերթին ունի իր պատճառները որոնողական համակարգի ռոբոտների ծանրաբեռնվածության և ինդեքսացման հետ կապված ժամանակային խնդիրների պատճառով: Այս երկու ամիսների ընթացքում ՆեոՄեդիայի կողմից ինտերնետում հրապարակվել են մի քանի կարևոր և մի քանի ոչ մեծ կայքեր, որոնցից յուրաքանչյուրի օպտիմիզացման վրա կատարվել են համապատասխան աշխատանքներ, և արդեն ժամանակն է տեսնել նախնական արդյունքները Գուգլ PR-ի տեսքով: Սակայն, ինչպես երևում է, նախորդ ամիսներին Գուգլի ներքին համակարգային մի քանի փոփոխությունները ազդել են հերթական PR թարմացման վրա, որի հետևանքով ամբողջ աշխարհի բազմահազարանոց վեբմաստերների բանակը երկար սպասումներից արդեն նյարդայնանում է

Գաղտնիք չէ նաև այն, որ եթե կայքն ունի մեծ կոնտենտ և համապատասխանաբար` բարձր PR ցուցանիշ, ապա այն արդեն կարող է որոշակի գումար բերել ադմինիստրատորին: Ցանկացած կայքէջ կարող է ծառայել որպես տեքստային գովազդի ռեսուրս այլ կայքերի առաջխաղացման համար` չնայած այն բանին, որ Գուգլը բավականին կոշտ դիրքորոշում ունի տեքստային հղումների առք ու վաճառքի հանդեպ:

Սակայն, որքան էլ որ որոնողական գիգանտն ու նրա մրցակից որոնողական այլ համակարգերը վատ տրամադրված լինել հղումների և հոդվածների առք ու վաճառքի և հետևաբար նաև ինտերնետային օպտիմիզացիայի հանդեպ, նրանք ինչ-որ տեղ ստիպված են տանել այդ օրեցօր զարգացող բիզնեսի առկայությունը: Աշխարհի բոլոր որոնողական համակարգերը ունեն մեկը մյուսից գոնե մի թեթև տարբերվող աշխատանքային սկզբումներ, սակայն ինդեքսացված էջերի կարևորության մակարդակում համարյա թե բոլորի մոտ նույն, փոքր-ինչ տարբերություններով, սկզբունքներն են` իրենց անվանումներով:

Այս առումով Google ընկերության կաղմից մշակված և ֆանտաստիկ հաջողությունների հասած PageRank (PR) դասակարգման սկզբունքը մնում է գերիշխողը ողջ աշխարհում, քանի որ համաշխարհային մասշտաբով դեռ ոչ մի որոնողական համակարգ չի կարողացել ավելի արդյունավետ չափորոշիչներ և համակարգային լուծումներ կիրառել, որի շնորհիվ կկարողանար ձեռք բերել օգտվողների մեծ զանգվածներ բոլոր երկրներում: Այդպիսին է նաև այսօր Հայաստանում. հայկական ցանցում որոնումների մեծամասնությունը կատարվում է Գուգլի (Google.am) միջոցով, և չնայած այն բանին, որ չափազանց շատ է խոսվում այն մասին, որ իբր Գուգլը հայերեն որոնումները լավ չի կատարում, այն մնում է միակն ու փաստորեն` ամենաարդյունավետը հայկական հայալեզու ցանցում: Հայկական և ոչ մի համակարգ, թեկուզ հատուկ հայկական ցանցի համար ստեղծված ռոբոտներով կամ լեզվային ճշգրտումներով հագեցած, չի կարող մրցակցել Գուգլի դեմ. Միայն մի բան. Գուգլի ինդեքսացնող ռոբոտի նման ճշգրիտ և արագ ռոբոտ հազիվ թե կարելի լինի ստեղծել մեզ մոտ, սակայն սա արդեն բոլորովին այլ թեմա է…

Ինչևէ, սպասենք Գուգլի քմահաճ Update-ին…

Վարդան Պապիկյան | ՆեոՄեդիա նախագիծ